Course summary

Bydd ein gradd mewn Hanes a Chymraeg yn dy alluogi i archwilio amrywiaeth eang o gyfnodau arwyddocaol, yn ogystal â rhoi cyfle iti ddyfnhau dy ddealltwriaeth o'r iaith Gymraeg, ei llenyddiaeth a’i statws cyfreithiol. Enillodd Hanes yn Abertawe raddfa fodlonrwydd o 93% yn Arolwg Myfyrwyr Cenedlaethol 2017 (100%) ac mae 100% o ymchwil yr Adran Gymraeg o safon ryngwladol neu'n uwch (REF 2014). O'r rhai sy'n graddio yn y maes hwn, mae 94% yn gyflogedig neu mewn astudiaeth bellach 6 mis ar ôl graddio (Cyrchfan Ymadawyr o arolwg AU). Enillodd 80% o'n myfyrwyr radd anrhydedd dosbarth 1af neu 2.1 yn 2017/18. Mae gennym ddewis eang o fodiwlau i ddewis o’u plith. Ceir modiwlau ar Ewrop ganoloesol, hanes America, barddoniaeth, drama, cyfieithu, hawliau iaith, a llawer iawn mwy. Mae ein campws ym Mharc Singleton yn edrych dros Fae Abertawe ac yn agos at Benrhyn Gŵyr. Mae’n lleoliad delfrydol ac yn borth perffaith i'r gorffennol. Mewn dim o beth, fe gei ddarganfod cestyll godidog fel Penfro a Maenorbŷr, yn ogystal ag eglwysi canoloesol y Gŵyr. Mae'r ail flwyddyn yn rhoi cyfle i astudio dramor am semester yn yr UDA, Canada, Tsieina, Hong Kong neu Singapôr. Byddwn yn dy gefnogi i ddatblygu pob math o sgiliau ar gyfer y byd academaidd a’r byd gwaith wrth iti astudio gyda ni. Rydym yn defnyddio ystod eang o ddulliau asesu, yn cynnwys traethodau, arholiadau, prosiectau, cyflwyniadau llafar, trafodaethau, adolygiadau, podlediadau a llawer mwy. Caiff yr addysgu ei lywio gan amgylchedd ymchwil bywiog. Mae darlithwyr y Gymraeg yn Abertawe, er enghraifft, yn cynnwys awduron a beirdd Cymru amlwg, ac enillwyr cystadleuaeth Llyfr y Flwyddyn Cymru. "Dewisais Hanes yn Abertawe gan fod y cwrs yn cynnig amrywiaeth eang iawn o bynciau ac mae'r modiwlau'n hynod o ddiddorol. Maent yn ymestyn o ymerodraethau Tsieina ac India, i'r Ail Ryfel Byd. Mae arbenigedd y darlithwyr yn ddihafal. "- Alistair Kirk. "Nid dysgu’r iaith yn unig yw astudio ar gyfer gradd yn y Gymraeg. Mae amrywiaeth eang o fodiwlau ar gael, sy’n golygu y gallwch ddysgu am bynciau fel Cymru a’i hanes, ei llenyddiaeth, ei sefydliadau a’i chyfryngau. Mae’r modiwlau yn apelio at bob math o bobl a byddwch yn derbyn digon o gefnogaeth gan eich darlithwyr. Byddwch yn cwrdd â phobl ar eich cwrs a fydd yn ffrindiau da i chi am byth!." – Lauren Evans Rydym yn gwarantu y cewch gynnig amodol ar gwrs ym Mhrifysgol Abertawe. Bydd gofynion y pwnc yn berthnasol. Dewch draw i’n Diwrnod Agored nesaf neu cysylltwch am ragor o wybodaeth.